भीमफेदी भैसे सडक स्तरोन्नति कार्यमा ढिलाई किन ?

भीमफेदी

२०७८/०९/३०

भैंसे–भीमफेदी सडकमा केही निजी घर परेकाले मुआब्जा विवाद छ । कोरोना संक्रमण जोखिमले पनि सडक स्तरोन्नति कार्यमा प्रगति नभएको प्रदेश यातायात पूर्वाधार विकास निर्देशनालय बागमती प्रदेशका निमित्त निर्देशक सहदेव बहादुर भण्डारी बताउँछन् ।

स्तरोन्नति गरिने क्षेत्रमा केही निजी घरटहरा पनि रहेकाले त्यसको व्यवस्थापन गर्दै निर्माण कार्य गर्नु परेकाले ढिलो भएको उनी बताउँछन् । कोरोना, जग्गाको स्वामित्व विवाद जस्ता कारणले सडक स्तरोन्नति कार्यले सोचेजस्तो प्रगति हासिल गर्न नसकेको उनले बताए ।

‘सो सडक क्षेत्रमा केही निजी घर पनि परेका छन् । उहाँहरुले मुआब्जा माग गर्नु भएको छ । हामी त्यसको समाधानमा लागेका छौं । विगतदेखि नै यो समस्याले निर्माण कार्य प्रभावित हुँदै गएको थियो,’ उनले भने, ‘त्यसैले पनि निर्माण कार्य समयमा पूरा हुने अवस्था रहेन ।’

भीमफेदी गाउँपालिकाको २, ४ र ६ नम्बर वडा हुँदै सडकको स्तरोन्नति गर्नुपर्ने भएकोले ती क्षेत्रमा करिव ४० घरहरु रहेको र त्यसैको व्यवस्थापन गर्न नसक्दा काममा ढिलाई भएको उनी बताउँछन् ।

‘हामी लगभग सहमति नजिक पुगेका छौं । सबैभन्दा बढी आवास क्षेत्र ४ नम्बर वडामा परेको थियो । हामीले विभिन्न चरणमा विवाद समाधानका लागि प्रयास गरेपछि अहिले काम भइरहेको छ,’ उनले भने, ‘त्यसमा स्थानीय तह र जनप्रतिनिधिहरुको भूमिका पनि महत्वपूर्ण रह्यो । हामी निजी जग्गामा बनेका घरहरुलाई मुआब्जा वितरणको तयारीमा छौं ।’

करिव ४० घर परिवारलाई २ करोड २१ लाख ८३ हजार रुपैयाँ मुआब्जा दिने तयारी रहेको उनले बताए । उनका अनुसार केही घर सार्वजनिक क्षेत्रमा बनेका कारण त्यस्ता घरको मुआब्जा दिन नसकिने भएकाले ती घरलाई सडक क्षेत्रबाट हटाउन घरधनीलाई आग्रह गरिएको छ ।

२ वटा पुलको ठेक्का निकाल्ने तयारी

निर्देशनालयले सो सडक क्षेत्रमा पर्ने पुलको पनि ठेक्का निकाल्ने तयारी थालेको छ । सो सडक क्षेत्रमा कुल ५ वटा पुल पर्ने र क्रमिक रुपमा त्यसको ठेक्का आह्वान गरेर निर्माण गर्ने तयारी निर्देशनालयको छ ।

निमित्त निर्देशक भण्डारीका अनुसार निर्देशनालयले केही महिनाभित्रै सो सडक अन्तर्गत पर्ने २ वटा पुलको ठेक्का आह्वान गर्ने तयारी गरेको छ ।

तत्कालका लागि सो सडक क्षेत्रमा पर्ने २ वटा लामो पुलको ठेक्का आह्वानको तयारीमा रहेको उनले बताए । ‘हामी २ वटा पुलको ठेक्का आह्वान गर्ने तयारीमा छौं । सो सडकमा पर्ने ४० मिटर लम्बाईको ढोका खोला पुल र ६० मिटर लम्बाईको माण्डु खोला पुलको ठेक्का आह्वानको तयारी भइरहेको छ,’ उनले भने ।

माण्डु खोला पुल हाल भइरहेको स्थानभन्दा केही तलबाट निर्माण गरिने उनले बताए । बाँकी रहेका ३ वटा साना पुल पनि क्रमिक रुपमा निर्माण गरिने उनले बताए ।